SUMMARY
This is AI generated summarization, which may have errors. For context, always refer to the full article.
Dati, sa balagtasan ipinamamalas ng mga makata ang kanilang galing; ngayon, spoken word poetry ang uso, lalo na sa millennials.
Isa sa mga kabataang nagpapayabong ng spoken word poetry si RR Cagalingan.
Para sa Buwan ng Wika, inimbitahan siya ng Rappler para bigkasin ang kanyang tulang “Tuwing ‘Tinatanong Kung Ano ang Ibig.” – Rappler.com
Tuwing tinatanong kung ano ang ibig
kapag hinahanap ang akmang salita,
sabihing taimtim: doon sa tahimik.
Laging nag-uusap ngunit walang lápit,
pudpod na ang ubod sa kakamamaya
tuwing tinatanong kung ano ang ibig.
Isinasandali at pasabit-sabit
itong pagnanais malusaw sa madla,
sabihing taimtim: doon sa tahimik.
Banggaan ng tinig habang nakahilig
sa paniniwalang mayroon pang mukha
tuwing tinatanong kung ano ang ibig.
Ilapat ang bibig sa baso’t isanib
ang málay ng laway ay maghihimalang
sabihing taimtim: doon sa tahimik.
Paubos nang lubos kapag sumasapit
itong kahulugang di masawata
tuwing tinatanong kung ano ang ibig
sabihin, taimtim: doon sa tahimik.
Add a comment
How does this make you feel?
There are no comments yet. Add your comment to start the conversation.