Can you tweet some ‘dalit’?

Miriam Grace A. Go

This is AI generated summarization, which may have errors. For context, always refer to the full article.

Rappler asks netizens to write original poetry in Filipino in less than 140 characters. This time, we’re using the native form called ‘dalit.’

MANILA, Philippines – Tumutula naman tayong netizens anomang panahon nating maibigan, alam ko. Pero di maiwasan, kapag Buwan ng Wika, mas naaalala at napapagpursigihan nating gawin ito. 

Sinimulan ko, halimbawa, ang pagpo-post ng dalit – isang anyo ng katutubong tula – nitong Agosto, habang hindi gumagalaw ang trapik sa Edsa. (Dati, tanaga ang tinutweet ko sa kahabaan ng biyahe.)

Agosto rin, noong 2013, nang ilunsad ng Rappler ang #Tweetanaga, isang paligsahan ng mga tulang gumagamit ng katutubong anyo, pero sa makabagong medium, ang microblogging site na Twitter. (BASAHIN: #Tweetanaga: Can you write poetry in 140?)

Kahanga-hanga ang naging tugon ng Twitter users na karamihan ay noon lang nakaalam ng tungkol sa tanaga. (BASAHIN: #Tweetanaga: 10 best social media poets).

Kaya sa pagtatapos ng buwang ipinagdiriwang ang pinauunlad nating wikang pambansa, sisimulan naman ng Rappler ang paligsahan ng mga #DaliTweet. 

Simple lang ang patakaran: mag-post sa Twitter ng dalit – isang katutubong tula na may 4 na taludtod o linya, may 8 pantig ang bawa’t taludtod, at may tugma. 

Katulad ng tanaga, ang dalit na noong araw ay isahan lamang ang tugma (magkakapareho ang tunog ng huling pantig ng bawat linya), ay maaari na ring gamitan ng ibang paraan ng pagtutugma: sunuran, salitan, inipitan. (Para sa detalyadong panuto sa pagsusulat nito, basahin ang blog ng makatang si Roberto Añonuevo.

Ayon sa ilang babasahin, ang mga naunang dalit ay kalimitang nagpapahayag ng dalangin, pagsamo sa Maykapal. Sa ngayon, naisip ko, sa dami ng pinoproblema ng tao – mula trapik, pag-ibig, mga politikong switik, at makabagong manlulupig – kahit ano marahil ang itula natin ay magmimistula na ring panalangin. 

Sabi ng mga premyadong makata at propesor na sinanggunian natin, puwede ang kahit anong paksa sa dalit. (Katugma rin ng “dalit” ang “galit,” kaya parang bagay ding gamitin ang anyong ito ng tula para ilabas ang galit natin sa buhay at sa lipunan, ano?)

Nauna ko nang hinamon ang ilang taga-Rappler at ilang kaibigan para subukang mag-#DaliTweet. 

Ang kinalabasan ay komentaryo sa maiinit na usapin: 




 Ang ilan ay may dalit tungkol sa mga personal na isyu:



Dali, mag-post na kayo ng dalit! Kakalapin ng Rappler sa isang live blog ang lahat ng entries mula ngayon, Agosto 26, hanggang Setyembre 9. Dapat gamitin ang hashtag na #DaliTweet at i-tag ang @rapplerdotcom. Kung kapos sa espasyo, basta #DaliTweet at #Rappler.

Pipiliin ng ilang premyadong makata at propesor ang pinakamagaling na mga lahok, at padadalhan ng Rappler ng souvenirs ang Twitter poets na ito.

Tamang-tamang makapag-isip, mukhang paralisado na naman ang trapik…

– Rappler.com

Add a comment

Sort by

There are no comments yet. Add your comment to start the conversation.

Summarize this article with AI

How does this make you feel?

Loading
Download the Rappler App!
Avatar photo

author

Miriam Grace A. Go

Miriam Grace A Go’s areas of interest are local governance, campaigns and elections, and anything Japanese.