SUMMARY
This is AI generated summarization, which may have errors. For context, always refer to the full article.
MANILA, Philippines – Uso pa rin ang sariling wika, hindi nalalaos ang pagiging makata.
Sa loob ng 3 linggong patimpalak ng Rappler ngayong Agosto – #Tweetanaga: Can you write poetry in 140? – binaha kami ng entries.
Ang “tanaga” ay isang katutubong klase ng tulang Filipino. May 4 na linya ito, 7 pantig bawa’t isa, at gumagamit ng iba-ibang kombinasyon ng tugma (mula sa orihinal na monorhyme noong araw).
Kung mapagkasya ang tanaga sa isang Twitter post, ito ang #Tweetanaga.
Ang contest na ito ay kontribusyon ng Rappler sa pagpapayaman ng pambansang lingua franca.
Pagsunod din ito sa sinimulan ng makatang Vim Nadera (@VimNadera), ngayo’y direktor ng Philippine High School for the Arts, na gamitin ang mga umuusbong na paraan ng komunikasyon para panatilihing buhay ang tulang Filipino.
May suporta ng National Commission for Culture and the Arts, sinimulan niya noong 2005 ang “Textanaga” nang maging texting capital of the world ang Filipinas. Sinundan niya ito ng “Diona Text” at “Dalitext.”
Kung pagbabasehan ang mahigit sa 600 na tulang aming natanggap, naaliw kayong mga tinatawag naming “mobile makata”:
Entries ay bumabaha Sa #Rappler #Tweetanaga. Pagdating sa paglikha, Pinoy, walang katugma. Can you write Poetry in 140? Hanggang Agosto 24
— Miss Go (@miriamgracego) August 18, 2013
Natuwa rin ang mga hurado, mga haligi ng Linangan sa Imahen, Retorika at Anyo (LIRA), ang poetry clinic ng National Artist na si Rio Alma – mga premyadong makata at awtor na sina Nadera, Joey Baquiran (@JoeyBaqui), at Rebecca Añonuevo.
“The entries are witty and updated on social issues. The lyric feeling apparently is still fashionable among the young,” ayon kay Baquiran, na nagtuturo ng literatura at malikhaing pagsulat sa Unibersidad ng Pilipinas.
Kung may napatunayan ang #Tweetanaga, ito ay kakayahan ng Filipino na tumula nang may lalim at kabuluhan – at minsa’y may sense of humor din – “sa panahon ng mabilis at nagmamadaling ugnayan at komunikasyon,” sabi ni Añonuevo, na nagtuturo ng writing at literature sa Miriam College naman.
Pumili ang mga hurado ng top prize. Ayon kay Añonuevo, napagkasunduan nilang “may talas ng talinghaga at mapanglimi ang himig” ng #Tweetanaga ni Jian Yumol (@thisstyjianbeat):
Pagmasdan mo ang araw Hindi upang mabulag. Bagkus upang masilaw, Mapayukó't mahabag. #Tweetanaga
— Jian Yumol (@thisstyjianbeat) August 22, 2013
Ang 9 pang nagwagi – mga komentaryo sa maiinit na isyu…
"Ibon ay umaawit, Bala man ay palapit. Ngunit ano ang himig Kung pinid ang pandinig?" #Tweetanaga @rapplerdotcom
— Zyan Lauro F. Caiña (@LauroZyan) August 10, 2013
Bahaw na nilalangaw/ Sa pinggan umaapaw/ Malamig at malagkit/ Ayos na rin sa yagit. #Tweetanaga #PoetryIn140 @rapplerdotcom
— diana moraleda (@dianamoraleda) August 3, 2013
@rapplerdotcom Maruruming daliri, Mayaman ang may-ari. Kapangyarihang taglay, Dukha ang pinapatay. #tweetanaga @shakirasison pinatulan ko 😛
— Onek ARCE (@onekarce) August 6, 2013
…pasimpleng advocacy
…at kakaibang pagpapahayag ng walang kupas na tema ng pag-ibig…
Amoy mo'y sumisirit/ Mabango, mapang-akit/ Pagsuyo'y sinasambit/ Ngiti ay ginuguhit. #Tweetanaga #Rappler
— Rio Hazel Hidalgo (@reeyohhazel) August 5, 2013
At sa dako paroo'y- Naghalik: dagat, buwan At sa dako parito'y Tayo't walang hangganan – #Tweetanaga #Rappler
— huwagMOKONGtitigan (@attorneymokong) August 5, 2013
Sa pagdating ng antok At paghila ng kumot Nasagi ka ng isip 'Di tuloy makaidlip #Tweetanaga #Rappler
— Lee Candelaria (@leecandelaria) August 4, 2013
…o pagkabigo ng puso:
Memory Surgery Anesthesia ang alak Sa pagbiyak ng utak Pagkat sabi ng duktor Alaala mo'y tumor @rapplerdotcom #tweetanaga
— Juan Ekis (@juanekis) August 12, 2013
At higit sa lahat, isang paalala: Ang pagiging online ay hinding-hindi dapat maging kapalit ng personal na koneksiyon:
@rapplerdotcom #Tweetanaga Minsan, dahil sa fb Nakakalimutan mo Na nandito lang ako Nag-aabang sa tabi
— audrey cruz-lubiano (@ooh_aud) August 7, 2013
“Kudos to Rappler, the poetic energy is unleashed during the Buwan ng Wika,” sabi ni Baquiran.
May mga humirit pang sana’y ituloy na lang ang #Tweetanaga kahit tapos na ang national language month, may premyo o wala. Hindi naman natin mapipigilan ang mga makata’t romantiko online, so sige lang!
Salamat – at kudos – sa lahat ng nag-#Tweetanaga!
(Sa mga nanalo: Makipag-ugnayan sa amin sa desk@rappler.com para sa inyong Rappler souvenir items. Pakilagay sa subject field: “#Tweetanaga winner.”)
– Rappler.com
Add a comment
How does this make you feel?
There are no comments yet. Add your comment to start the conversation.