MANILA, Philippines – Sa kauna-unahang pagkakataon, itutuon ang pagdiriwang ng Buwan ng Wika sa mga katutubong lengguwahe dahil “kung pababayaan, maaari pang maglaho nang tuluyan” ang mga ito, anunsiyo ni Virgilio Almario, ang tagapangulo ng Komisyon sa Wikang Filipino (KWF) nitong Lunes, Hulyo 29.

“Bakit natin ito ginagawa? Dahil nais nating pagpugayan at patunayan na mahalagang bahagi ng ating pagkabansa ang 130 katutubong wika sa Filipinas. Ito ang buong pagmamalaking ipinapahayag ng ating tema na ‘Wikang Katutubo: Tungo sa Isang Bansang Filipino,’” ika ni Almario sa flag raising ceremony ng Lungsod ng Maynila sa Liwasang Bonifacio.

Saksi sa programa ang alkalde ng kapital na si Isko Moreno, ang bise alkalde na si Honey Lacuna, ang mga konsehal, at iba pang mga opisyal ng Maynila.

Ayon sa Ethnologue: Languages of the World, may 186 wika sa Pilipinas, ngunit 182 na lang rito ang buhay. Ang karamihan ng mga lengguwahe ay dala ng mayaman na kasaysayan at isla-islang heograpiya ng bansa.

Magsisimula ang Buwan ng Wika pagpatak ng Agosto sa Huwebes. Buong buwan, magkakaroon ng iba’t ibang mga programa ang KWF para payabungin ang pagkakakilanlan sa mga katutubong wika.

Kahalagahan ng katutubong wika: Ayon kay Almario, ang bawat wika ay may sariling buhay, at nakapaloob sa buhay nito ang tradisyon ng maraming henerasyon ng mga Pilipino.

“Kung hindi natin ito aalagaan, manganganib ito; at kung pababayaan, maaari pang maglaho nang tuluyan. Kapag naglalaho ang isang wika, tila may isang tahanan o kamalig ng ating alaala at tradisyon ang mawawala at di na mababawi kailanman,” sabi ni Almario.

Dahil dito, ang pagpapahalaga ng wikang katutubo ay katumbas na rin ng pagpapahalaga sa mga kapwa Pilipinong nagmula sa ibang tradisyon. (BASAHIN: Wikang katutubo: ‘Wika ng kapayapaan’)

“Kayâ ang ating mga katutubong wika – mulang Ivatan hanggang Mandaya gaya ng nakita ninyo sa video kanina – ay niyayakap natin, niyayakap ng wikang pambansa upang matupad ang ating hangarin na makabuo ng isang wikang pambansa na tunay na ingklusibo,” dagdag ni Almario.

Mga programa sa Agosto: Ilan sa mga programang nakalatag sa buwan ng Agosto ay ang Pambansang Kumperensya sa Pagsasalin sa Unibersidad ng Santo Tomas, Agosto 5-7; Usapang Meranaw Forum sa Mindanao State University, Agosto 28; Chabacano Noon at Ngayon Forum sa Western Mindanao State University, Agosto 31; at marami pang iba.

Nagtambalan din ang KWF at ang La Consolacion College-Bacolod para sa pagsasagawa ng Pambansang Kongreso sa Katutubong Wika sa SMX Convention Center sa Bacolod City sa Agosto 19-21.

Silipin ang buong talaan ng mga programang inihanda ng KWF at ng iba pang mga organisasyon dito. – Rappler.com