Dakbayan sa Sugbo, nagtakda’g mga bag-ong lagda alang sa mga wala, di kumpleto ang bakuna

CEBU CITY, Philippines – Ang mga mulupyo nga dili hingpit o kumpleto ang bakuna batok sa COVID-19 kay ipaubos sa mas hugot nga mga palisiya sa kalihokan, taliwala sa pagpakusog ni Mayor Michael Rama sa kampanyang pagbakuna nga gipasiugdahan sa nasudnong kagamhanan

“Ang tanan nga establisemento, institusyon, ug entidad bisan pa pribado kun pampubliko kay gipahimangnoan nga ipakaylap ang impormasyon nga sila musirbisyo lang, mutugot pagpasulod, ug pagpa-agi sa mga hingpit og bakuna nga mga kliyente ug indibidwal sugod Enero 1, 2022,” matod ni Mayor Michael Rama sa iyang bag-ong lagda.

Ang mga dili hingpit kun wala gyud nabakunahan nga mga residente kay gitugutan lang nga makasulod sa mga kinahanglan nga establisemento susama sa mga banko, mga klinika sa panglawas, mga tambalanan, ug mga merkado.

Bag-o lang nagsaad si Rama nga bakunahan ang tanan nga kalipikado nga mga lumulupyo sa dili pa matapos ang tuig aron mga menor de edad na lang nga dili pa kuwalipikado sa bakuna ang mahabilin sa pagsugod sa tuig 2022.

Ang iyang administrasyon nagtuo nga makatabang kaning mga hugot nga palisiya sa pagduso sa pagsaka sa kadaghanon sa magpabakuna.

Sa iyang pagpakighinabi sa mga mantalaan niadtong Biyernes, Disyembre 3, si Rama nagsulti pag-usab nga ang mga residente nga nagdumili nga mabakunahan kay dili silotan. Hinoon, gawas sa pagsulod sa pribado kun pampubliko nga establisemento – nga anaay pagpinig sa kinahanglan nga establisemento – sila usab kay dili tugotan nga makaapil sa uban nga mga kalihokan. (Basaha ang kinatibuk-an nga lagda sa ubos.)

Ubos sa bag-ong lagda, ang mga dili bakunado nga mga bata nga nag-edad og 12 hangtod 17 kay dili tugotan nga makasulod sa mga establisemento bisan pa man sila ubanan sa usa ka hingpit og bakuna nga ginikanan, tigbantay, kun responsable nga hamtong sugod Enero 1, 2022.

“Ang nagpadayon ug walay hunong nga pagbakuna sa mga bata nga nag-edad og 12 hangtod 17 kay pakusgan ug ilakip sa insentibo sa programa sa pagbakuna,” sigon ni Rama sa iyang lagda.

Matod pa ni Rama, ang mga dili bakunado nga bata nga nag-edad og 11 paubos, kun mga residente nga dili pa kuwalipikado sa pagbakuna batok sa COVID-19, kay tugotan gihapon nga makasulod sa mga awtorisado nga establisemento kon kuyogan sa usa ka ginikanan, tigbantay, kun responsableng hamtong nga hingpit og bakuna.

Sumala sa lagda, ang mga mubyahe nga dili hingpit kun walay bakuna kay paninglan og nagatibo nga resulta sa RT-PCR test sulod sa 72 ka oras sukad sa pagbyahe niini. Dawaton usab nila ang negatibo nga resulta sa antigen test kun saliva test sulod sa 48 ka oras sukad sa ilang pagbyahe isip alternatibo.

Mao kini ang kinatibuk-an nga lagda nga gimantala sa Cebu City Public Information Office:

– Rappler.com

Gihubad kini sa Cebuano ni Art Lubiano gikan sa orihinal nga bersyon sa Ingles, Cebu City sets new rules for unvaccinated, partially vaccinated residents.