#WeDecide: Kukuatayo ti Pilipinas – ti ikkistayo iti dangadang iti 2022

Umannamongtayo amin, di kadi, nga iti eleksion ti Pilipinas iti 2022 ket sanguentayo iti kangangatuan a pateg manipud iti giddato nga eleksion dandanin uppat a dekadan ti napalabas?

Idi 2016, idi nagbalin a presidente ni Rodrigo Duterte, naregget a pinaliiw mi dagiti simbolismo nga inawit ti panangabakna: ti panangiluges ti maysa a mayor kadagiti mabigbig iti sangkapagilian, ti panangpatapok ti maysa a promdi kadagiti Manileño, ti panangsurpresa ti maysa a nasiglat a politiko kadagiti kalabanna a mangipakpakat pay laeng iti daan nga estilo ti panagkampania, ti panangkalub ti maysa a saan unay a mabigbig nga addaan ti 16.6 a milion a botos iti kinapudno a 26 milion ti kimmontra kaniana babaen iti uppat a nagtaray.

Sakbay a malpas dayta a tawen ti eleksion, naamiristayo amin a saantayo a makisangsango iti maysa manen nga animal a politiko tapno palabsen lattan a paset ti kapadasan dagiti biddutna ken aganus bayat ti innem a tawen a kaaddana iti opisina a mangnamnama nga agbotostayoton a naadalan ken nalalaing inton sumaruno nga eleksion.

Umadadu a familia ti agbisin. Minilmilion ti maawawanan ti panggedan wenno saan a makabirok ti uray ania. Agserserra dagiti babassit a negosio. Maibagbaga kadagiti agprotprotesta a drayber ti dyip, ania ti bibiang no marigrigatkayo ken mataykayo iti bisin? Rinibribo ti matmatay gapu iti coronavirus. Awan nalawag a naggastusan iti binilbilion a doliar nga utang kasilpo ti pandemic. Sinangapulo a ribo a suspetsado a babassit nga agususar ti droga ket mapappapatay babaen kadagiti pulis ken vigilante. Maibalbalud dagiti kritiko ken aktibista. Mapilpilay ti independiente a media Matagtagibassit a “papel laeng a maibelleng iti basuraan” ti ligal a ballaigi kontra iti nalawa a panaggamgam ti China iti kadanuman ti Pilipinas. Maibagbaga kadagiti unipormado a lallaki a mabalinda a mangrames wenno paltoganda ti mabagbagi ti babbai uray ta adda ti Presidente iti likudanda.

Iti maysa a punto wenno iti sabali, pinadas dagiti para allilaw ni Duterte nga ilawlawag isuna babaen iti agduduma a rason kas: kasta ti Bisaya, kasta ti taga-Mindanao,kasta ti siga,kasta ti mayor, kasta ti makaumili, kasta ti ama, kasta ti lider.

Ah, lider – maysa a pammalagip iti saan a patas nga atension nga itited ti media, a saan laeng iti Rappler, kadagiti kayatna ti agturay ken kadagiti maiturayanto no maidokumento ti eleksion. Ikagumaanmi man nga idatag iti kaaduan dagiti pakaseknan ken kasapulan ti umili, tapno matukmaan dagiti sentimientoda, tapno mapagtutunos dagiti bosesda, tapno magutigot ti kolektibo a bilegda, limitado laeng ti pagpatinggaanmi.

Agpatingga dayta itattan.

Para kadagiti agdadamo, nagdesision ti Rappler nga iwaksinan ti hashtag-islogan nga inususartayo iti panangidokumento kadagiti eleksion manipud 2013: #TheLeaderIWant. (#TiKayatkoALider)

Ti kangrunaan a karakter ti eleksion iti 2022 ket dagitinto botante. Ti kampanianto ket ti panangipasagepsep kadagiti pampanunot dagiti Filipino a saantayo a paisursurot iti ayos iti siasinuman nga ipatakder ti administrasion a nagturay nga awanan kuenta, awanan puso, mangbutbuteng ken korap – kasta met a naranggas kadagiti pagatatapanna a kalaban ken natulnog iti pudpudno a kabusor. Ti mensahe ket ti panangkumbinsir iti amin nga addaan karbengan nga umili a ti kakaisuna a botosna ket maibilang. Maibilangto. Mabalin a maibilang.

#WeDecide (#Agdesisiontayo). Daytoy ti usaren ti Rappler ken dagiti komunidad tayo mangrugi inton Mayo 10, kabayatan nga irugitayo ti panangidokumento ti eleksion ti Pilipinas inton Mayo 2022.

“Atin ang Pilipinas.” Kukuatayo ti Pilipinas.

Daytoy ti pagtutunosantayo nga ikkis. Iti panangidokumentomi iti kampania ken panagbobotos, kabayatan nga agserbi dagiti katinnulong a komunidad kadagiti lokalidad ken sektor, subbotentayonto ti panangipangpangruna iti biag, ti panangrespetotayo kadagiti karbengan ti sabali, ti pannakipagriknatayo kadagiti karrubatayo, ti dignidadtayo kas mangmangged, ti kabaelantayo a mangted ti disente a biag iti familiatayo. Kas agbaybayad ti buis, ipingettayonto a kiddawen ti panagsungbat kadagiti obligasion. Iwaksitayonto ti akikid a panagpampanunot para iti kolektibo a pagsayaatan ti pagilian. Ipingettayonto iti imatang ti sangalubongan, ti soberaniatayo a maysa a nasion.

#WeDecide: Kukuatayo ti Pilipinas.

Tagikuaentayonto ti eleksion, subbotentayonto daytoy pagilian.

Mangrugitayo itattan. – Rappler.com

Daytoy ti pannakaipatarus iti Ilokano manipud iti orihinal a bersion iti Ingles ni Miriam Grace A. Go, #WeDecide: Atin ang Pilipinas – our 2022 battle cry.

Basaen yu ti dadduma nga pannakaipatarus ditoy: 

• Pangasinan: #WeDecide: Gawa tayo so Pilipinas – say ikelyaw tayo no 2022
• Bikol: #WeDecide: Satuya An Filipinas – an satuyang pangapodan sa 2022
• Hiligaynon: #WeDecide: Aton ang Pilipinas – aton panawagan sa 2022
• Cebuano: #WeDecide: Atoa ang Pilipinas – ang atong kawsa karong 2022
• Waray: #WeDecide: Aton an Pilipinas – an panawagan naton hit 2022