Apollo Quiboloy

HINDI TOTOO: Hindi wanted ng FBI si Apollo Quiboloy

Rappler.com
HINDI TOTOO: Hindi wanted ng FBI si Apollo Quiboloy
Noong Enero 31, isinama ng FBI si Quiboloy sa kanilang listahan ng mga “most wanted” o mga pinaghahanap na suspek o kriminal. Isinama si Quiboloy sa listahan na ito dahil iniimbestigahan siya para sa mga krimen tulad ng sex trafficking, fraud, smuggling, at iba pa.
Buod
  • Ang sabi-sabi: Hindi kasama si Apollo Quiboloy sa listahan ng “most wanted” ng Federal Bureau of Investigation (FBI) ng gobyerno ng Amerika. 
  • Marka: HINDI TOTOO. Sumasang-ayon ang Rappler sa markang “Hindi Totoo” na nauna nang ibinigay ng Altermidya sa kanilang fact check sa sabi-sabing ito.
  • Ang katotohanan: Noong Enero 31, isinama ng FBI si Quiboloy sa kanilang listahan ng mga  “most wanted” o mga pinaghahanap na suspek o kriminal. Isinama si Quiboloy sa listahan na ito dahil iniimbestigahan siya para sa mga krimen tulad ng sex trafficking, fraud, smuggling, at iba pa. 
  • Bakit kailangang i-fact-check: Nang isulat ang fact check na ito, mayroon nang 288 na reaksiyon, 52 na komento, at 32 na share ang post na naglalaman ng sabi-sabing ito sa Facebook.
Mga detalye 

Mula Abril 14, kumalat ang isang post sa Facebook na naglalaman ng sabi-sabing hindi kasama sa listahan ng “most wanted” na kriminal ng Federal Bureau of Investigation (FBI) ng Estados Unidos. 

Ayon sa post: “A politically motivated case was filed against Pastor Q in the US, but it is NOT..NOT..NOT tantamount to say that the good Pastor Q is already a fugitive or the FBI’s most-wanted list. Far from that.” 

(Kinasuhan si Pastor Q sa US dahil sa mga rason na may kinalaman sa pulitika, pero HINDI, HINDI, HINDI ito nangangahulugang ang mabuting Pastor Q ay isang kriminal na tumatakbo, o nasa listahan ng most wanted ng FBI. Ang layo nito sa katotohanan.) 

Nang isulat ang fact check na ito, mayroon nang 288 na reaksiyon, 52 na komento, at 32 share ang post na naglalaman ng sabi-sabing ito sa Facebook.

Hindi totoo ang sabi-sabing ito. 

Noong Enero 31, naglabas ang FBI ng poster ni Quiboloy sa kanilang opisyal na website. Isinama ito sa listahan ng itinuturing nilang “most wanted” na tumatakbo o hindi pa nadarakip. 

Nakalagay sa post ang mga krimen na ibinibintang kay Quiboloy, kabilang ang mga sumusunod: sex trafficking, fraud, smuggling, at iba pa. 

Ayon din sa post na ito, nakasuhan si Quiboloy dahil sa pulitika, at hindi dahil siya ay napatunayang kriminal.

Hindi rin totoo ang sabi-sabing ito. 

Noong Pebrero 8, naglabas ng pahayag ang embahada ng Estados Unidos kung saan tinatanggi ang mga sabi-sabing ito. 

Ayon sa kanilang pahayag: “The FBI’s release of a wanted poster for Kingdom of Jesus Christ founder Apollo Quiboloy follows a multi-year effort by law enforcement. It is unrelated to the Philippines’ ongoing presidential election campaign.” 

(Ang pagpapalabas ng wanted poster para sa tagapagtatag ng Kingdom of Jesus Christ na si Apollo Quiboloy ay nakabase sa imbestigasyong isinagawa nang ilang taon ng mga nagpapatupad ng batas. Wala itong kinalaman sa kasalukuyang nagaganap na eleksiyon para sa pagkapangulo ng Pilipinas.) – Sofia Guanzon/Rappler.com kasama ng Altermidya

Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.

Add a comment

Sort by

There are no comments yet. Add your comment to start the conversation.