DILI TINUOD: Duterte giila sa US isip usa sa 12 ka kampyon batok sa korupsyon sa kalibotan

Hinali nga pagsiplat

• Gi-angkon: Gipasidunggan si Presidente Rodrigo Duterte sa US State Department isip usa sa 12 ka kampyon batok sa korupsyon sa tibuok kalibotan.
• Rating: DILI TINUOD
• Ang tinuod: Ang US State Department wala miila ni Duterte isip usa sa 12 ka kampyon batok korupsyon sa tibuok kalibotan niadtong 2021 para sa pagpadayag og liderato, kaisog, ug impak sa pagpugong, pagekspose, ug pagpakigbatok sa korupsyon. Ang orihinal nga gimantala nag-gikan sa usa ka satirical page ug gipakaylap nga walay konteksto.
• Nganong among gisusi ang pagkatinuod niini: Dili momenos sa duha ka Facebook page ang nagpakaylap sa maong satirical post susama sa kamatuoran. Anaa nay 5,700 shares, 2,900 comments, ug 11,500 reactions ang mga post kung ikombinar, sa pagsuwat niini. Daghang mambabasa usab ang nagpadangat sa mga post pamaagi sa email para beripikaon sa Rappler.

Hingpit nga detalye

Ang mga sikat nga post nga nag-angkon nga si Presidente Rodrigo Duterte gipasidunggan sa US State Department isip usa sa 12 ka kampyon batok sa korupsyon sa tibuok kalibotan kay gisaw-an sa social media niadtong Oktubre 2021.

Duha ka Facebook pages, “PINAS News Portal – Posts” and “Friends of Sara Duterte,” nagsaysay sa ilang kapsiyon nga si Duterte nagpadayag og liderato, kaisog, ug impak sa pagpugong, pagekspose, ug pagpakigbatok sa korupsyon.

“Duterte was called a ‘standard-bearer for a new generation of Philippine politicians who prioritize anti-corruption and transparency initiatives in his election campaign and in office’,” matod pa sa kapsiyon niining mga page.

Adunay 5,700 shares, 2,900 comments, ug 11,500 reactions sa mga post kung ikombinar, sa puntong gisuwat kini. Daghang mambabasa usab ang nagpadangat sa mga post pamaagi sa email para beripikahon sa Rappler.

Ang gi-angkon kay dili tinuod.

Ang US State Department wala miila ni Duterte isip usa sa 12 ka kampyon batok sa korupsyon sa tibuok kalibotan nga gipasidunggan ubos sa bag-ong inisyatibo sa kagamhanan ni Biden niadtong 2021. Sukad nga gisugdan kining premyoha, usa ra ka Pinoy ang nakadawat niining ganti: si Pasig City Mayor Vico Sotto, kinsa gipasidunggan niadtong Pebrero.

Matod ni US Secretary of State Anthony Blinken sa iyang asoy nga ang kagamhanan ni Biden nagpalusad niining “International Anticorruption Champions Award” para ilhon ang mga indibidwal nga walay kapoy nga nagtrabaho, kasagaran nag-atubang og kalisod, para panalipdan ang kasihagan o transparency, pakigbatokan ang korupsyon, ug segurohon nga anaay accountability sa ilang tagsa-tagsang mga nasod.

Si Sotto – dili si Duterte – ang gipasabot sa US State Department nga nagpasiugda sa bag-ong henerasyon sa mga politiko nga naghatag og dakong importansya sa mga inisyatibo batok korapsiyon ug kasihagan sa ilang mga kampanya niadtong piniliay ug sa dihang nilingkod na sa pwesto.

“Sotto has sought to solidify his reputation as a fresh voice with a new, more transparent approach to governance,” sumala sa US State Department.

Ang US State Department nagsulti usab nga si Sotto, kanhi kagawad, nagpasiugda sa pagduso sa ordinansa nga may kalabotan sa kagawasan sa impormasyon kun freedom of information sa Pasig nga nagtugot sa mga lumulupyo og sayon nga akses sa mga pangpublikong dokumento.

Ang kompletong lista sa mga kampyon batok sa korupsyon sa US Department of State niadtong 2021 naglangkob sa mga musunod: Ardian Dvorani sa Albania, Diana Salazar sa Ecuador, Sophia Pretrick sa Federated States sa Micronesia, Juan Francisco Sandoval Alfaro sa Guatemala, Ibrahima Kalil Gueye sa Guinea, Anjali Bhardwaj sa India, Dhuha A. Mohammed sa Iraq, Bolot Temirov sa Kyrgyz Republic, Mustafa Abdullah Sanalla sa Libya, Sotto sa Pilipinas, Francis Ben Kaifala sa Sierra Leone, ug Ruslan Ryaboshapka sa Ukraine.

Ang angkon nag-gikan sa usa ka Facebook page nga ginganlan og “Cebu Dairy News.” Ang Cebu Dairy News nagpaila nga usa ka satirical page. – Art Lubiano, Antonio Manaytay/Rappler.com

Gihubad kini sa Cebuano ni Art Lubiano gikan sa orihinal nga bersyon sa English, FALSE: US names Duterte among 12 global anti-corruption champions.

Si Art Lubiano ug Antonio Manaytay kay mananaog sa Aries Rufo Journalism Fellowship. Ang pagsusi sa pagkatinuod niini kay giduki sa usa ka myembro sa Rappler research team ug usa ka senior editor. Pagkat-on pa mahitungod sa fact-checking mentorship program sa Rappler dinhi.

Ipahibalo sa amoa kung adunay makaduda nga Facebook pages, mga grupo, mga account, mga website, mga artikulo, o mga litrato sa imong network pamaagi sa pagkontak namo sa factcheck@rappler.com. Mag-uban kita sa pagpakigbatok sa mga bakak, binagsa nga Fact Check sa pagkakaron.