HINDI TOTOO: Para kay Bong Go, mayayaman at elitista ang mga tagasuporta ni Leni Robredo

Buod

• Ang sabi-sabi: Sinabi diumano ni Senador Bong Go na ang mga tagasuporta ni Bise Presidente Leni Robredo ay mga “elitista” at “mayayaman.”
• Marka: HINDI TOTOO
• Ang katotohanan: Hindi kailanman sinabi ni Senador Go ang mga nakasaad sa larawan. 
• Bakit kailangang i-fact check: Nang isinusulat ang fact check article na ito, nakatanggap na ng mahigit sa 8,400 reactions, mahigit sa 2,100 comments, at 159 shares ang larawang naka-post sa Facebook. 

Mga detalye

Nag-upload ang Facebook page na “Shut Up!” ng isang pekeng quote card ni Senador Bong Go na mayroong larawan ng senador. Ayon sa larawan, sinabi umano ni Go na, “Kung elitista’t mayaman ka, kakampink ka. Kung mahirap kang atat sa tunay na pagbabago, kasangga mo ako. Tapat na serbisyo ko ang kailangan mo. Kitakits sa 2022!”

Nagmukhang opisyal na inilabas ng Senado ang quote card na ito dahil sa ginamit na logo ng institusyon.

Nang isinusulat ang fact check article na ito, ang Facebook post ay nakatanggap na ng mahigit sa 8,400 reactions, mahigit sa 2,100 comments, at 159 shares.

Hindi totoo ang sabi-sabing ito.

Napag-alaman ng Rappler na ang post na ito ay “sponsored post.” Ang ibig sabihin nito, nagbayad ang may-akda upang ipakalat ng Facebook ang post sa mas maraming tao. Ayon sa screenshot na ito, isang indibiduwal na nagngangalang Ricardo dela Cruz Flores Jr. ang nagbayad upang gawing “sponsored post” ang larawan.

Hiningi rin ng Rappler ang panig nina Senador Bong Go upang kumpirmahin kung totoo nga ang nasabing post.

Ayon sa tagapagsalita ng kampo ng senador sa isang panayam gamit ang Viber, peke raw ang naturang larawan.

Noong Nobyembre 13, inihain ni Senador Bong Go ang kanyang certificate of candidacy sa pagkapangulo sa darating na halalan sa 2022. – Kiko Mendoza/Rappler.com

Magbahagi kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network. I-send ang mga ito sa factcheck@rappler.com. Sa bawat fact check, labanan natin ang pagkalat ng mali o mapanlinlang na impormasyon.