DIRI TINUOD: Ihap han mga bumutos kan Marcos Jr. ha Saudi Arabia

An sumaryo

• An mga uru-istorya: Usa ka milyon nga overseas absentee voters an bumutos kan Ferdinand “Bongbong” Marcos Jr. ha Saudi Arabia.
• Marka: DIRI TINUOD
• An kamatuuran: Base ha pinakaurhi nga datos han Commission on Elections (Comelec), 282,605 la an kabug-usan nga ihap han mga rehistrado nga mga Pilipino nga botante ha Saudi Arabia.
• Kay ano nga kinahanglan ini i-fact check: Han gin-surat ini nga fact check, mayda na 7,800 reaksiyon, 957 nga komento, ngan 162,725 nga views an bidyo nga nagsasarang hini nga uru-istorya ha Youtube.

Kompleto nga detalye

Usa nga bidyo an gin-upload dida han Abril 14 ha Youtube channel nga “Showbiz Chika-Doro” kun diin nagsisiring nga usa kuno ka milyon nga mga Pilipino an bumutos kan presidential candidate nga hi Ferdinand “Bongbong” Marcos Jr. ha Saudi Arabia.

Nakabutang ha caption han video: “BBM milyon na an nakuha nga boto ha Kingdom of Saudi Arabia sumala kan Madam Yumi/VP Leni kulelat?”

Ha 3:15 timestamp han bidyo, nagyakan an babaye, nga gintatawag ha bidyo nga hi Madam Yumi, “Ang boto ni Marcos milyon, pero kay Leni Robredo, wala pang isang daang libo.” (An botos ni Marcos milyon, pero kan Leni Robredo, waray pa usa ka yukot.)

Ginyakan ini ni “Madam Yumi” kahuman niya igkumpara hi Marcos ha iba pa nga mga kandidato nga nadalagan ha pagkapresidente. Yakan niya, an pagkita kuno han kadam-an in dako an tsansa ni Marcos nga magdaog.

Han gin-surat ini nga fact check, mayda na 7,800 nga reaksyon, 957 nga komento, ngan 162,725 nga views an bidyo nga nagsasarang hini nga uru-istorya ha Youtube.

Diri ini tinuod.

Imposible nga makakuha hin usa ka milyon nga botos tikang ha mga Pilipino ha Saudi Arabia hi Marcos o hin-o man nga kandidato, kay sumala han pinakaurhi nga datos han Comelec, 282,605 la an rehistrado nga overseas absentee voters ha ginsiring nga nasud yana nga 2022.

Bisan an kabug-usan nga ihap han ngatanan nga botante ha butngang sinirangang Asya, kun nakain an Saudi Arabia, in may 786,997 la nga botante.

Waray ginyakan ni Madam Yumi kun diin niya nakuha an datos nga usa ka milyon an bumutos kan Marcos ha Saudi.

Nagtikang an pagbotos han mga overseas nga mga Pilipino dida han Abril 10, usa ka bulan ugsa mag eleksiyon ha Mayo 9.

An presidente la, bise presidente, mga senador, ngan mga party-list nga groupo an puydi butosan han mga Pilipino nga aadto ha iba nga nasud.

Tikang dida han 2004, ginatos ka yukot an botos nga tikang ha overseas absentee voters. Tungod han COVID-19, damo an waray makapagparehistro para han eleksiyon yana nga 2022 o kun di man ky tungod nga nanguli ha Pilipinas an iba. – Rappler.com

Gin-translate ha Waray ni Virginia Niez an fact check nga may orihinal nga bersiyon ha Filipino, “HINDI TOTOO: Bilang ng mga bumoto kay Marcos Jr. sa Saudi Arabia“ nga ginsurat ni Lorenz Pasion.

Move volunteer ha Eastern Samar hi Virginia Niez.

Pasabta kami kun meada niyo makit-an nga mga maruhaduhaon nga Facebook pages, groups, accounts, websites, articles, o mga retrato nga imo nakit-an ha iyo komunidad ha pamaagi han pagpadara hin email ha factcheck@rappler.com. Pwede gihapon magpadara hin mga sayop nga uru-istorya ha #FactsFirstPH tipline. Pwede gihapon ipadara an mga pulong ha Facebook han Rappler, pinaagi hin pribado nga mensahe ha twitter han Newsbreak ngan ha Viber fact check chatbot. Padayon kita han pag-ato kontra ha online disinformation tungod han pag fact-check han mga nagkakalat nga mga sayop ng impormasyon.