[WATCH] ’Yung Totoo?: Fact check ukol sa kayamanang ginto ng mga Marcos

Alam nating mayaman ang mga Marcos, pero saan ba nanggaling ang pera nila? Sabi-sabi sa social media, nagmamay-ari daw sila ng tone-toneladang ginto! Dahit dito, maililigtas daw nila hindi lang ang Pilipinas, kundi pati ang buong mundo.

Pero… parang imposible naman yata ‘yan. Ano ‘yung totoo? I-fact check natin! Isa-isahin natin ang mga dahilan kung bakit hindi totoo ang sabi-sabing galing sa ginto ang kayamanan ng mga Marcos.

Sabi nila… may isang milyong toneladang ginto ang pamilyang Marcos. Grabe, ang yaman! Pero hindi ito totoo.

May kaugnayan din sa haka-hakang ito ang sabi-sabi rin sa social media na ang Pilipinas daw ang nagmamay-ari ng pinakamaraming gold reserves sa buong mundo. Hindi rin ‘to totoo.

May sabi-sabi rin na naging abogado ng umano’y “Tallano royal family of the Philippines” si dating pangulong Ferdinand Marcos. And sabi pa ng mga mahihilig magkalat ng haka-haka, Maharlika Kingdom daw ang kaharian ng mga Tallano na sumasakop umano hindi lang sa Pilipinas, kundi pati sa karatig na lupain. Sabi rin nila, binayaran daw ng mga Tallano si Marcos ng malaking halaga ng ginto. ‘Di nga? Bakit parang ngayon lang natin narinig ito? ‘Yan ay dahil kahit katiting man ay walang batayan ang mga kuwentong ito.

Kung ganoon, saan nanggaling ang kayamanan ng mga Marcos? Itinuturing na “ill-gotten wealth” ang kayamanan ng mga Marcos dahil napatunayang mas malaki ang halagang nalikom nilang pag-aari kaysa sa lehitimong kinita nila habang nakaupo bilang presidente si Ferdinand Marcos at nakaupo naman bilang governor ng Metro Manila si Imelda Marcos.

May nakita ka bang kaduda-dudang impormasyon tungkol sa kayamanan ng mga Marcos? Magpadala ng link at screenshot nito sa factcheck@rappler.com! – Rappler.com