Manny Pacquiao, ayaw…Maneee!!!

Patricio N. Abinales

This is AI generated summarization, which may have errors. For context, always refer to the full article.

Manny Pacquiao, ayaw…Maneee!!!
'Unaha imong probinsya. Kay kung mahimo nimong parehas sa Dabaw ang Sarangani, Hesus, Bai, dili lang senador siguro ang imong mapangandoy'

Dear Maneee,

Na unsa na man ka uy?

Hapit ko nahulog sa katre ganingang buntag sa pagdungog nako nga modagan ka kuno pagka- senador. Na hala, pagka-kuyaw ba!

Naunsa na man ka uy? Wala ka ma’y nahimo sa sa Kongreso. Ingon sa Rappler, ikaw daw ang pinaka-absinot didto. Dayon nakit-an nako sa TV nga miingon ka wala ka magpakita sa Komonwelt kay tua ka sa Sarangani para atimanon ang mga panginahanglan sa mga tawo.

Pero Maneee, mi-text ko sa akong mga ka-cosa sa Sarangani ug nangutana kung tua ka didto. Ang tubag nila pareho: “Bay tua man si Congressman sa Gensan. Iya ra mang mga assistant ang mianhi.” Kinsa may atong tuhoan aber? 

Ingon ka wala sab ka maka-apil sa Congress sessions kay ga-training ka. Mas motuo pa ko niani Pero Manee dili man sab adlaw-adlaw ang training nimo di ba? Humana ang away ninyo ni Floyd, wa na ka’y kontra, ngano wala man ka mobalik sa Kongress?

Lisod magpalusot niani Manee. Naa man sa record gud.

Lahi ang Senado

Pero balik ta sa isyu.

Bai, dili baya basta basta ang pagka-senador. Kung mabutang ka nianang posisyona kinahanglan bag-uhon na nimo imong pagtanaw. Dili na Sarangani ang imong kabanayan, tibuok Pilipinas na.  

Kung aduna kay mga projects kinahanglan nga maayo ka mobalanse sa mga mangayo niani. Kung ihatag lang ni nimo sa Sarangani o Mindanao, daghang manga-suko. Paboritism ka kuno.

Dili na ka mahimo magsalig kay Jinkee o si Buboy na lang. Sa Kongreso mahimo barkada-barkada lang, kay ang ubang Kongresman ingon ana man sab ang ilang sakop. Pero lahi na sa Senado. Kinahanglan mas propesyonal na ang imong sakop sa buhatan. Kinahanglan makahibalo sila mag-“multi-tasking” (mao ning akong bag-ong pulong nga giingon sa ako ni Caruso).

Dayon kanang imong mga isponsor nga mahimong balaod, kinahanglan imo ning ipanalipod sa debate sa Senado. Banga-on nimo sila ni Alan Cayetano, Pia Cayetano, Coco Pimentel, Chiz Escudero ug TG Guingona. Mas hadlok pa kung si Miriam ang motindog ug mosugod ug debate nimo. Maulaw mi ug tan-aw kung mahitabo kini. 

Kabalo ko nga brayit ka kaayo. Dako kaayo ang akong pagdayeg sa imohang kinabuhi. Mamaligya-ay ka ug sigarilyo atong bata pa ka. Boksingero pud. Dayon sukad sa imong primerong knockout pwerte nang saka ang imong swerte. Ug gapadayon pa gihapon ni karon.

Pero kining klase nga pagka-brayit ang dili haom sa Senado, Manee. Kinahanglan nga naa kay gamay nga mahibaw-an sa mga balaod atong miagi, para kanang mga balaod nga imong itanyag dili ma-utro. Kataw-an ka ana. Kinahanglan sab nga aduna kay hanaw sa kasaysayan sa Pilipinas; dili na lang GenSan o Sarangani ang imong ipagsugid. Unya Manee, naa ka ba’y paghisayod sa kasaysayan sa Pilipinas.

Tinuod nga mahimo ka mag-abang ug tutor, pero di ko sigurado kung maayo ka mohinumdum sa iyang itudlo sa imoha. Kabalo ko niani kay ang pagtudlo sa kasaysayan sa ato-a laay kaayo. Dili mapakagana. Seguro gyud nga maka-tulog ka!

Unaha imong probinsya

Manee, sa akong panahom, mas maayo siguro kung mobalik na lang ka sa Sarangani ug seryosohon nimo ang pagtabang didto. Kay pobre kaayo nang imong probinsya. Tan-awa ra gud ang gisulat sa Rappler: ang Sarangani ang pinaka-walo sa mga pobreng probinsya sa Pilipinas.

Daghan kaayong kabus sa imong panimalay Manee.

Kung seryoso gyud ka nga mag-alagad sa mga katawhan sa Sarangani, kinahanglan masakwat sa nimo ilang mga panginabuhi. Unsa’y buot pasabot niani? Yano kaayo.

Una imong i-follow up katong imong mga gipang-hatag nga ambulansya, para maniguro lang nga wala ni kawata. Kung tua pa sila, kinahanglan madugang ka ug mga public health clinic ug ipa-usbaw nimo ang mga pipila ka ospital lang didto. Dayong mangita ka ug paagi nga madami ang mga doktor ug nars nga mobalik o mobalhin sa Sarangani. Buot pasabot niani ang imong ihalad nga suweldo mas dako dako gamay sa ilang nadawat karon.

Dayon Manee, ayaw kalimti intawon ang mga eskwelahan. Ang mga maestro. Dili lang ubos sa maayo ilang suweldo, wala sila’y mga chalk, lapis, eraser, ballpen, ug uban pang panginahanglan nila ug sa ilang estudyante.

Wa pud silay mga textbook, Manee. Sa usa ka eskwelahan nga gibista namo atong usa ka bulan, natagbaw lang sila ug Xerox sa mga panid sa usa ka libro ang gigamit sa mga bata. Gibaylo-baylo lang ang kada usa ka panid sa mga bata.

Gipapha ang History kay wa may textbook ang eskuwelahan. Mohatag unta ko ug kopya nako pero ingon ang maestro nga dili ni nila magamit kay wala ma’y pagtugot sa DECS. Illegal nga textbook ang guwas niani.

Wa silay hanaw sa Algebra kay ang maestra nga gatudlo niani miguwas nga Inglis titser diay. Ang 1+1, 1×1, 1-1 ug 1/1 ray gitudlo, dayon wala na. Sa music lang maka-ingon ang mga bata nga hawod sila.

Wala ka ba kaila aning mga bata-a Manee? Dili ba nimo makita ang imong kaugalingon niining mga bata? Ug pipila man kunhay ang mahimo nga parehas nimo? Ug pipila sa ilaha ang dili makapauna sa High School? Sa College?

Gatuo ako nga ang kadaghanan sa ilaha mahimong manglilimos. Ang sangpotanan sa kadaghanan nila mopareho sa ilang mga ginikanoan: mag-uuma, peon, o kung dili mahimong mga kriminal.

Busa Manee, ako kining hangyo awhag kanimo. Tabangi sa ang Sarangani, unaha imong probinsya. Kay kung mabuhat ni nimo, mahimo nimong parehas sa Dabaw ang Sarangani, Hesus, Bai, dili lang senador siguro ang imong mapangandoy. Mas taas pa niana.

Mamalihug lang,

Usa ka botante nimo

Rappler.com

Patricio N. Abinales is an OFW

 

Add a comment

Sort by

There are no comments yet. Add your comment to start the conversation.

Summarize this article with AI

How does this make you feel?

Loading
Download the Rappler App!