#NoPlaceForHate: Baro a pagalagadan iti Rappler comments thread

Manipud ita nga aldaw, agresibo kami a mangikkat kadagiti bastos ken nagubsang a posts ken comments a saan a maikanatad iti nasayaat a sursuro. 

Dagiti debate ken diskusyon agsanggirda iti prinsipyo ti kinatakneng, respeto ken kababalin.

Awan ti anosmi kadagiti komentaryo a pagsasawan, mangtagibassit, mangpabain ken mangbutbuteng ti pada a tao. Dagitoy nga aramid saan a makatulong iti kinatakneng  a diskusyon a pundasyon ti narukbos a demokrasya.

No kayat tayo a mapalawa ti demokrasya, saan a rumbeng a maikkan ti lugar dagiti kababalin a bunga ti awan ammona wenno kina-ignorante ken saan a husto nga inpormasyon.

Ti kalintegan ti panagsao, saanna kayat a sawen a lisensiado tayo a mangperdi ti reputasyon wenno rakraken ti kredibilidad ti sabali a tao. Ken saanna kayat a sawen nga adda karbengan tayo nga agbalin nga iresponsable ken mamerperdi ti dayaw.

Ngem ketdi ti kalintegan ti agirakrakurak isu tay panangbigbig ti kalintegan ti tunggal maysa a mangiburay ti ania man a kapanunotanna ken kaririknana. No man pay daytoy ket saan a maki-ayon ti panirigan ti sabali, saan a rumbeng nga irakurak na iti nakasusuron a wagas.

Ngarud alaenmi manen daytoy a gundaway a mangtagikua  iti espasyo ti Rappler kas nasimbeng  ken natalged a lugar para kadagiti netizens.  Adda karbengan ti siasinoman a mangiburay  ti aniaman a kapanunotanna nga awan ti panagbuteng wenno panagamak. 

Idi inpatakdermi ti Rappler uppat a tawenen ti napalabas, inpalubos mi dagiti komentaryo ditoy site mi. Namati kami idi – ken mamati kami inggana ita – a ti social media para laeng ti pagdidiskusyunan ken teknologia a makatulong a mapaimbag ti sosyedad tayo.

Ditoy Rappler, natalged kayo a mangipeksa ti karirikna yo nga awan buteng kadagiti maibato kadakayo manipud kadagiti komentarista nga awan rupa ken nagan da a ti laeng gagem da  ket tay mangpasardeng kadagiti saan a maki-ayon iti pammatida.

Nawada ti ridaw mi a mangaklon iti amin a pagtaktakderan ken panirigan – no la ketdi ammo tayo ti mangrespeto iti pada tayo a tao a saan nga umayon ti prinsipyo tayo. Agistrikto kami itan a mangsagat kadagiti komentaryo. Daytoy laeng ti wagas a masalakniban ti kinasimbeng daytoy nga espasyo. – Rappler.com

Read the English version here

Read the Bisaya version here