HINDI TOTOO: Binalak ng mga aktibista na manggulo sa inagurasyon ni Marcos

Buod

• Ang sabi-sabi: Susubukan umanong guluhin ng mga makakaliwang grupo ang inagurasyon ni Ferdinand Marcos Jr. ngayong Huwebes, Hunyo 30. 
• Marka: HINDI TOTOO 
• Ang katotohanan: Mapayapang nagdaos ng programa ang mga progresibong grupo sa Plaza Miranda, malayo sa lugar ng inagurasyon ni Marcos, bilang konsiderasyon sa hiling ng Philippine National Police (o PNP) na ibahin ang lugar na pagdarausan nila ng protesta. 
• Bakit kailangang i-fact-check: Iniulat ng SMNI News Channel ang nasabing kasinungalingan. Nang maisulat ang fact check na ito, umabot na sa 40,000 ang nagbigay ng reaksyon, 8,700 ang nag-iwan ng komento, at 8,100 ang nagbahagi ng naturang paskil. 

Mga detalye 

Isa na namang kasinungalingan ang pinakawalan ni Jeffrey “Ka Eric” Celiz sa SMNI News Channel. Ayon sa nagpakilalang “dating kadre” ng New People’s Army (NPA), susubukan umanong guluhin ng mga makakaliwang grupo ang inagurasyon ni Marcos. 

Sa video, makikita ang katagang, “Mga dating kadre, ibininunyag ang masamang plano ng makakaliwang grupo vs PBMM administration.”

Kasinungalingan ito. 

Ngayong Huwebes, Hunyo 30, mapayapang inilipat ng mga progresibong grupo, kagaya ng Bagong Alyansang Makabayan, ang kanilang protesta sa Plaza Miranda. Ito’y bilang konsiderasyon sa hiling ng PNP, at pag-iwas na rin sa maaaring mangyari kung magsasalubong ang kanilang hanay at ang grupo ng mga tagasuporta ng anak ng diktador. 

Samantala, matatandaan na nagbigay din ng pahayag si chief Lieutenant General Vicente Danao Jr. na pumigil sa mga naturang grupo na magdaos ng protesta malapit sa National Museum. Ipinaalala naman ng Commission on Human Rights (CHR) na ang pagdaraos ng protesta ay pagpapaalala sa mga opisyal na bahagi ng demokrasya ang kritisismo. – Rochel Ellen Bernido/Rappler.com

Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com.