HINDI TOTOO: Tarsier ang ipapalit sa mga Aquino sa bagong disenyo ng P500 bill

Buod

• Ang sabi-sabi: Tarsier ang ipapalit sa mga Aquino sa bagong disenyo ng P500 bill.
• Marka: HINDI TOTOO
• Ang katotohanan: Peke ang larawan ng P500 bill na may Philippine tarsier. Lumabas sa reverse image search na ang larawan ng tarsier na ginamit sa edited na P500 bill ay mula sa Russian artist na si Evgeny Turaev. Tanging ang bagong disenyo lamang ng P1,000 bill ang inilabas ng Bangko Sentral ng Pilipinas para sa bagong polymer banknotes.
• Bakit kailangan i-fact-check: Mabilis na ikinalat ng iba’t ibang Facebook users ang sabi-sabing ito. Nang isulat ang fact-check na ito, mayroon nang mahigit 8,400 reaksiyon at 11,000 shares ang post sa Facebook.

Mga detalye

Isang post noong Nobyembre 25 ng Facebook user na si “Rhein Rain” ang nagpakita ng isang larawan ng P500 bill na may disenyong Philippine tarsier.

Sinabi sa caption ng post ang linyang “AQUINO LEFT THE GROUP… THE Official Release of BSP in APRIL 2022.”

Mabilis na ikinalat ng iba’t ibang Facebook users ang sabi-sabing ito. Nang isulat ang fact-check na ito, mayroon nang mahigit 8,400 reaksiyon at 11,000 shares ang post sa Facebook.

Hindi totoo ang sabi-sabing ito.

Ang disenyo ng P500 bill sa post ay isang manipuladong larawan. Lumabas sa reverse image search na ang larawan ng Philippine tarsier na ginamit sa P500 bill ay mula sa isang Russian artist na si Evgeny Turaev noong 2017.

Ang nasabing larawan ng tarsier ay isang stock photo sa iba’t-ibang websites tulad ng Adobe Stock, depositphotos.com, Shutterstock, at 123rf.com. 

Inilabas ng Bangko Sentral ng Pilipinas (BSP) and bagong disenyo ng P1,000 bill nitong Disyembre 11 kung saan pinalitan ng larawan ng isang Philippine eagle ang mga larawan ng mga bayani ng World War II na sina Josefa Llanes Escoda, Vicente Lim, at Jose Abad Santos. Wala nang ibang inilabas na disenyo ang BSP bukod sa nasa P1,000 bill. 

Sinabi ni BSP Governor Benjamin Diokno sa isang panayam na wala pang diskusyon para sa pagpapalit ng disenyo ng P500 at iba pang bills. Paliwanag ni Diokno, unang ginawan ng bagong disenyo ang P1,000 bills dahil ito ang madalas na ginagawan ng pekeng kopya. 

Ang bagong disenyo ng P1,000 bills ay planong gamitin ng BSP sa polymer banknotes na ipapalit sa lumang disenyo ng peso bills. Sa kasalukuyan, ang Philippine banknotes ay gawa sa magkahalong bulak at abaca fiber. – Lorenz Dantes Pasion/Rappler.com

Si Lorenz Dantes Pasion ay isang Rappler Intern. Ang fact-check na ito ay sinuri ng miyembro ng research team ng Rappler at ng senior editor. Basahin ito para sa karagdagang detalye tungkol sa internship program ng Rappler.

Magbahagi kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network. I-send ang mga ito sa factcheck@rappler.com. Sa bawat fact check, labanan natin ang pagkalat ng mali o mapanlinlang na impormasyon.