Sinimulan ang konstruksiyon ng MRT7 sa administrasyon ni PNoy

Ang sabi-sabi: Proyekto sa ilalim ng Build, Build, Build at Build Better More ang Metro Rail Transit (MRT) 7. 

Sa isang video na nagtatampok ng pag-usad ng konstruksiyon ng mga istasyon ng MRT7, sinabi ang sumusunod: “Batasan Station na po mga kababayan, ito na po ang pinaka-sample. At dito rin po, may mga gumagawa rin po na atin pong nakita. Tuloy-tuloy po ang mga build, build, build projects at build better more na tinutuloy po ng ating pangulong Marcos.”

Marka: KULANG SA KONTEKSTO

Bakit kailangang i-fact-check: Ang video na naglalaman ng sabi-sabi ay kasalukuyang mayroong 5,813 views. Itinampok din ang kaparehong video sa isang hiwalay na reaction video. 

Ang katotohanan: Sa ilalim ng administrasyon ni dating pangulong Benigno Aquino III pinasinayaan noong ika-20 ng Abril 2016 ang groundbreaking ceremony ng MRT7, na magkokonekta sa Bulacan sa istasyon ng MRT sa North Avenue.

Sa ilalim ng administrasyon ni dating pangulong Gloria Macapagal-Arroyo noong 2008 pa napirmahan ang kontrata para sa MRT7. Noong 2001 unang isinumite ang proposal para sa nasabing proyekto. 

Naantala lamang ang konstruksiyon ng proyekto dahil sa pabago-bagong administrasyon, mga pampinansiyal na usapin, at kontrobersiyang may kinalaman sa lugar na dapat pagtayuan ng common station nito – sa SM North EDSA ba o sa Trinoma. 

Mayroon nang fact check ang Rappler noong 2021 hinggil sa kaparehong sabi-sabing kulang sa konteksto. – Ailla Dela Cruz/ Rappler.com

Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.