Bileg ken Pagrebbengan: Mayor ti Siudad, Bise Mayor, Konsehal

Mayor ti Siudad

Panagtakem

• 3 a tawen manipud iti tengnga ti aldaw ti Hunio 30 kalpasan ti eleksion
• Mabalin a mabotosan agingga iti tallo nga agsasaruno a termino  

Kualipikasion

• Makipagili iti Filipinas
• Rehistrado a botante iti siudad a pagpabotosanna
• Residente iti siudad a pagpabotosanna iti saan a nabibiit ngem 1 tawen sakbay ti eleksion
• Makabasa ken makasurat iti Filipino wenno iti uray ania a sabsabali a lokal a lengguahe
• Saan a naub-ubing ngem 21 anios iti aldaw ti eleksion

Bileg ken Akem 

• Mangsuperbisar kadagiti amin a programa, proyekto, serbisio ken aktibidad ti gobierno ti siudad  
• Mangipakat kadagiti amin a linteg ken ordenansa mainaig iti turay ti siudad
• Mangisayangkat kadagiti amin nga annuroten (policy), programa, proyekto, serbisio ken aktibidad ti gobierno ti siudad 
• Mangirusat ken mangikagumaan iti pannakaur-or dagiti kasapulan ken mateggedan ken mangusar kadagitoy para iti pannakaisayangkat kadagiti plano
• Mangipanamnama a ti siudad, addaan kadagiti kangrunaan a serbisio ken umdas a pasilidad 

Naadaw iti Local Government Code of 1991 

Bise Mayor ti Siudad 

Panagtakem

• 3 a tawen manipud iti tengnga ti aldaw ti Hunio 30 kalpasan ti eleksion
• Mabalin a mabotosan agingga iti tallo nga agsasaruno a termino  

Kualipikasion

• Makipagili iti Filipinas
• Rehistrado a botante iti siudad a pagpabotosanna
• Residente iti siudad a pagpabotosanna iti saan a nabibiit ngem 1 tawen sakbay ti eleksion
• Makabasa ken makasurat iti Filipino wenno iti uray ania a sabsabali a lokal a lengguahe
• Saan a naub-ubing ngem 21 anios iti aldaw ti eleksion

Bileg ken Akem 

• Mangiwardas iti konseho ti siudad (city council) 
• Mangpirma kadagiti amin a kasuratan para iti panaggastos ti konseho ti siudad
• Mangdutok kadagiti opisial ken empleado ti konseho ti siudad
• Agtakem a mayor ti siudad no adda permanente a pannakabakante
• Mangaramat kadagiti bileg ken mangisayangkat kadagiti pagrebbengan ken akem ti mayor ti siudad kadagiti kasasaad ti temporario a pannakabakante  

Naadaw iti Local Government Code of 1991 

Konsehal ti Siudad

Panagtakem

• 3 a tawen manipud iti tengnga ti aldaw ti Hunio 30 kalpasan ti eleksion
• Mabalin a mabotosan agingga iti tallo nga agsasaruno a termino  

Kualipikasion

• Makipagili iti Filipinas
• Rehistrado a botante iti siudad a pagpabotosanna
• Residente iti siudad a pagpabotosanna iti saan a nabibiit ngem 1 tawen sakbay ti eleksion
• Makabasa ken makasurat iti Filipino wenno iti uray ania a sabsabali a lokal a lengguahe
• Saan a naub-ubing ngem 18 anios iti aldaw ti eleksion. Dagiti kandidato kadagiti dadakkel a siudad, masapul a saan a naub-ubing ngem 21 anios iti aldaw ti eleksion.

Pakabuklan ti Konseho ti Siudad

• Ti Bise Mayor ti siudad nga agserbi a mangiwardas nga opisial (presiding officer)
• Dagiti nabotosan a regular a kameng ti konseho 
• Ti Presidente ti Liga ng mga Barangay ti siudad
• Ti Presidente ti Sangguniang Kabataan Federation ti siudad
• 3 a pannakabagi a sektoral: 1 manipud kadagiti babbai, 1 manipud kadagiti mangmangged iti agrikultura wenno industria, ken 1 manipud iti ania man kadagiti sumaganad: nakurapay iti siudad, indiheno nga umili, imbalido wenno addaan dis-abilidad

Bileg ken Akem 

• Mangaprobar kadagiti ordenansa ken mangipasa kadagiti resolusion para iti epektibo a pannakaituray ti siudad  
• Mangur-or kadagiti kasapulan ken mateggedan para kadagiti plano iti panagdur-as, panggep dagiti programa, ken prioridad ti siudad 
• Mangipasa kadagiti ordenansa a mangipalubos kadagiti prangkisa ken mangaprobar kadagiti permiso wenno lisensia  
• Mangkontrol kadagiti aktibidad mainaig iti pannakusar dagiti daga, pasdek, ken estruktura 
• Mangaprobar kadagiti ordenansa para iti pannakaidanon dagiti kangrunaan a serbisio ken pasilidad  

Naadaw iti Local Government Code of 1991 

– Rappler.com

Sinukisok ni Vernise Tantuco ti Rappler.com | Impatarus iti Ilokano ti UMPIL (Unyon ng mga Manunulat sa Pilipinas)