MANILA, Philippines – Matapos ang ilang taon mula noong nagsara ang construction companies sa Saudi Arabia, ipinangako ng Saudi Arabia na makukuha na ng nasa 10,000 na overseas Filipino workers (OFWs) ang kanilang mga sahod na hindi pa nababayaran.

Inanunsiyo ng Department of Migrant Workers (DMW) ang pangako ng Saudi Arabia noong Nobyembre 2022, pagkatapos magkita sina Pangulong Ferdinand Marcos Jr. at si Saudi Crown Prince Mohammad bin Salman sa Asia-Pacific Economic Cooperations Summit sa Bangkok, Thailand.

”The Crown Prince, His Royal Highness, announced and said that this was his gift – he really prepared for this and this was an agreement reached by the Saudi government just a few days ago,” sabi ni Migrant Workers Secretary Susan Ople sa anunsiyo. (Ang Crown Prince ang nag-anunsiyo na regalo niya ito – talagang pinaghandaan niya ito, at napagkasunduan ito sa gobyerno ng Saudi nitong mga nakaraang araw lamang.)

Maraming OFW ang naghihintay na makuha ang kanilang claims na umaabot nang bilyon-bilyong piso. 

Nagbabala rin ang DMW tungkol sa mga nagkukunwaring ”middleman” o tagaayos ng claims.

Noong Pebrero 6, 2024, kinumpirma ni Pangulong Ferdinand Marcos Jr. na nagsimula na ang pagbabayad ng Saudi Arabia sa claimants sa pamamagitan ng mga tseke mula sa Alinma Bank sa Saudi. Pinoproseso naman ng Overseas Filipino Bank at Land Bank of the Philippines ang mga tseke.

Patuloy na ia-update ng Rappler ang pahinang ito tuwing maglalabas ng anunsiyo ang DMW.

Proseso para sa mga biyuda at next of kin

Noong Miyerkules, Marso 27, inilabas ng DMW ang mga alituntunin na maaaring sundan ng biyuda, tagapagmana, o kamag-anak ng isang OFW claimant na pumanaw na.

Upang makuha ang claim, kailangang isumite ang mga sumusunod:

• Affidavit of Identification mula sa mga lokal na otoridad at mga taong di-interesado upang kumpirmahin ang pagkakakilanlan ng taong kukuha ng claim at ang relasyon nito sa namatay
• Extra-judicial Settlement mula sa mga tagapagmana, na suportado ng mga patunay ng relasyon (halimbawa: marriage contract, birth certificate), at mga government-issued ID ng lahat ng partidong kasama
• Deeds of Undertaking mula sa mga claimant upang obligahin ang tagapagtupad at iba pang mga kasama sa orihinal na kasunduan na pantay-pantay na ipamigay ang responsibilidad na mag-settle ng claim na hindi kasama sa extra-judicial settlement
• Special Power of Attorney na nagtatalaga ng tao na kung kaninong bank account kung saan idedeposito ang mga pondo pagka-clear ng tseke
• Proof of Publication o pagpapatunay ng paglalathala ng extra-judicial settlement sa dyaryong nasyonal na ipinamimigay sa loob ng tatlong linggo
• Bureau of Internal Revenue Clearance sa mga kasong kinakailangang may bayarang buwis
• Kapag ang tagapagmana ay menor de edad at higit pa sa P50,000 ang kahati ng makukuha sa net estate ng namatay na claimant, kailangan ng utos ng korte na naglalaman ng otoridad ng guardian (natural man o legal guardian) upang katawanan ang menor de edad sa extra-judicial settlement ng ari-arian ng namatay na claimant

Isumite ang mga dokumento sa Office of the Director IV, Internal Audit Services sa 3rd floor ng DMW, Blas F. Ople Building., Ortigas Ave cor. Edsa, Mandaluyong City hanggang Abril 15 para sa unang batch.

Iaanunsyo pa ng departamento ang deadline para sa mga susunod na batch.

Nagsimula man ang mga payout, mayroon pa ring mga sumusubok na humabol na maisama sa listahan ng mga claimant, ayon kay DMW Officer-in-Charge Hans Cacdac.

Makokontak ang DMW tungkol sa Saudi claims sa email na ito: saudiclaims@dmw.gov.ph

Ito ang template ng email na iminungkahi ng DMW noong panahong nangongolekta pa ng datos para sa listahan:

Maaari din tumawag sa hotline ng Saudi claims sa +63 920 517 1059. – Rappler.com