Nobel Prize

Ano-ano ang inihahain sa Nobel Banquet?

Michelle Abad

This is AI generated summarization, which may have errors. For context, always refer to the full article.

Ano-ano ang inihahain sa Nobel Banquet?
(1st UPDATE) Sa karaniwang taon, dalawang bangkete ang inihahanda tuwing Disyembre 10: sa Stockholm, Sweden, para sa awardees sa physics, chemistry, physiology o medicine, literature, at economic sciences; at sa Oslo, Norway, para sa Nobel Peace laureates. Nitong 2021, sa Oslo lamang nagkaroon ng bangkete.

MANILA, Philippines – Matapos tanggapin nina Rappler CEO Maria Ressa at Russian journalist Dmitry Muratov ng Nobel Peace Prize nitong Biyernes, Disyembre 10, dumalo rin sila sa engrandeng Nobel Banquet sa Grand Hotel sa Oslo, Norway, kinagabihan.

Ang Nobel Peace Prize – ang pinakaprestihiyosong parangal sa buong mundo – ay iginagawad sa tao o organisasyong nag-ambag, sa pinakamahusay na paraan, sa pagkakasundo ng mga bansa, pagpapatigil ng tunggalian, at pagsusulong ng kapayapaan. 

Si Ressa ang kauna-unahang Filipino na ginawaran ng Nobel Peace Prize. Kabahagi niya sa parangal si Muratov ng pahayagang Novaya Gazeta para sa kanilang kontribusyon sa kalayaan sa pamamahayag, na importante para sa demokrasya at kapayapaan. 

Ang parangal ay iginagawad ng komiteng hinirang ng Storting o Norwegian Parliament, pagkatapos ng proseso ng nominasyon na tumatagal nang walong buwan.

Kung prestihiyoso ang parangal, malamang na mga ipinagmamalaking pagkain din ang ihahain sa bangkete.

Silipin natin ang naging piging sa Oslo nitong Disyembre 10 at ang mga nakaraang bangkete para sa Nobel laureates. 

Sino-sino ang dumadalo?

Dalawang bangkete ang inihahanda para sa mga tatanggap ng premyo tuwing Disyembre 10, ang anibersaryo ng kamatayan ni Alfred Nobel, ang imbentor na nagpasimuno ng Nobel Prizes.

Ayon sa huling habilin ni Nobel, ang mga magkakamit ng Nobel Prize para sa physics, chemistry, physiology o medicine, at literature ay gagawaran sa Stockholm, Sweden. (Ang nananalo ng Nobel Prize para sa economic sciences, na unang iginawad noong 1969, ay pinararangalan din sa Stockholm.)

Samantala, ang nagkakamit ng Nobel Peace Prize ay ginagawaran naman sa Oslo, Norway. 

Nitong 2021, dahil sa mga paghihigpit na dulot ng COVID-19 pandemic, nilimitahan sa 40 katao ang bisita sa parangal kina Ressa at Muratov sa Nobel Banquet sa Oslo noong Disyembre 10. (Sa karaniwang panahon, higit sa 200 ang dumadalo sa bangkete.)

Umupo sa iisang mesa ang mga laureate at ang Crown Prince ng Norway, Pangulo ng Storting, ang Punong Ministro, at iba pang mga kinatawan ng gobyerno at non-profit na organisasyon. (Nauna nang bumisita ang laureates sa Royal Palace ng Norway para magbigay-galang sa Hari at Reyna ng Norway. Karaniwang dumadalo ang Hari at Reyna sa bangkete mismo – katunayan, dumalo sila sa seremonya ng pag-aabot ng medalya at plake kina Ressa, Muratov, at sa 2020 winner na United Nations World Food Programme.)

Bilang pagpupugay kay Ressa at sa Pilipinas, kinanta at tinugtog ng Håkon Kornstad Trio ang “Bayan Ko.”

Ano-ano ang inihahain sa Nobel Banquet?

Samantala, ang in-person na bangkete sa Stockholm ay ipinagpaliban sa pangalawang pagkakataon nitong 2021 dahil din sa COVID-19. 

Sa halip, isang seremonya ang inorganisa ng Nobel Foundation sa Blue Hall ng Stockholm City Hall, habang ang Nobel laureates ay pinarangalan sa kani-kanilang mga bansa. Ang pagtanggap nila ng Nobel Prize ay natunghayan sa isang virtual stream.

Guests of honor sa seremonya at bangkete sa Stockholm ang Hari at Reyna ng Sweden, at mga miyembro ng Royal Family. Karaniwang dumadalo rin ang mga kinatawan ng gobyerno ng Sweden.

Paano ang paghahanda? 

Dahil daan-daang tao ang kailangang ipaghanda sa isang karaniwang bangkete ng Nobel Prize, maraming preparasyon ang kailangan upang mapagsabay-sabay ang pagluluto at paghahatid ng pagkain sa mga dadalo.

Ayon sa Nobel, ito ang bumubuo ng catering staff sa Nobel Banquet:

  • Catering manager, banqueting hall manager, at head chef
  • 8 head waiter
  • 210 waiters at waitresses
  • 5 wine waiter
  • 20 tagaluto
  • 20 tagasilbi ng pagkain at tagahugas
Paano ang ayos ng mga mesa?

Noong mga unang taon ng Nobel Prize, nakaayos ang mga mesa sa hugis ng sapatos ng kabayo. Ngayon, mahahabang mesa ang ginagamit, at ang mesa kung saan uupo ang laureates, o table of honor, ay nasa gitna ng bulwagan.

Maglalagay ang mga catering staff ng:

  • 6,730 piraso ng porselana
  • 5,384 na baso
  • 9,422 piraso ng kubyertos

Ayon sa Nobel, “Binibigyan ng pantay-pantay na pangangalaga ang pag-aayos ng lahat ng mesa, sa table of honor man o sa mga mesang para sa mga estudyante.” (The same care is given to each place setting, whether it is for the table of honor or the tables for students.)

Ano-ano ang inihahain sa Nobel Banquet?
Ano-ano ang pagkain?

Ang bida ng bangkete? Siyempre, kung ano-ano ang kakainin ng mga dadalo sa seremonya.

Sa seremonya tuwing Disyembre 10, hindi ipinaaalam kung ano ang nasa menu hanggang sa araw mismo ng seremonya. 

Hindi biro ang pagbili ng ingredients para sa salo-salo sa Nobel. May isang taon, ayon sa Nobel, na bumili sila ng 2,692 dibdib ng kalapati, 475 lobster tails, 100 kilo ng patatas, 70 litro ng sweet and source raspberry vinegar sauce, 67 kilo ng Jerusalem artichoke, 53 kilo ng Philadelphia cheese, at 45 kilo ng lightly smoked salmon.

Narito naman ang mga dating naging menu sa Nobel Banquet:

  • 1901-1910 (Mga unang taon ng Nobel Prize)
    • Pampagana o appetizer: Hors d’oeuvres” – tinapay na may nakapatong na iba’t ibang klase ng keso at karneng puti o pula. Maaari ring pastry puffs na may karne, pagkaing-dagat, keso, at gulay. Kasunod nito ang consommé, sabaw na gawa sa seasoned stock. 
    • Main course: Putaheng karne na puti o pula. Noong unang Nobel Banquet, poached brill (isda) na may white wine sauce, fillet ng beef imperial, at breast ng hazel grouse (ibon) na may Maderia sauce ang ipinakain.
    • Panghimagas o dessert: Ice cream, sariwang prutas, at pastries
  • 1921-1930 (Pagkatapos ng World War I)
    • Pampagana: Sabaw ng pagong
    • Main course: Karne ng itik, pabo, hazel hen, o black grouse. Noong 1927, main course ang fillet ng turbot (malapad na isda) na may kasamang talaba, at duck a la orange na may artichoke.
    • Panghimagas: Ice cream o parfait, mga prutas, tsokolate
  • 1941-1950 (Pagkatapos ng World War II)
    • Pampagana: Consommé, malapot na sopas
    • Main course: Karne ng reindeer, baka, gansa, manok, o pheasant. Noong 1946, main course ang inihaw na reindeer na may lingon berry sauce. Mahahanap ang lingon berry sa mga kagubatan ng Sweden.
    • Panghimagas: Prutas tulad ng mansanas at peras, cake, ice cream
NOBEL BANQUET. Nobel Banquet at the Golden Hall of the Stockholm City Hall on 10 December 1958. Source: Brendler & Åkerberg Public domain via Wikimedia Commons
  • 1981-1990
    • Pampagana: Salmon mousse na may crayfish sauce, cured fillet ng reindeer, juniper berry cured salmon, pâté ng pinausukang igat at sole
    • Main course: Fillet ng moose na may morel sauce, Brussel sprouts at jelly, patatas na may leek, fillet ng usa, inatsarang moose, lingon berry sauce
    • Panghimagas: Nobel parfait
  • 1991-2001
    • Pampagana: Isda, shellfish, gulay
    • Main course: Wild game (karne), kabute, berries na galing sa kagubatan ng Scandanavia. Noong 1991, inihaw na itik na may archipelago sauce ang main course.
    • Panghimagas: Nobel parfait
Ano-ano ang inihahain sa Nobel Banquet?
  • 2019 (Pinakahuling Nobel Banquet bago mag-pandemya)
    • Pampagana: Kalix vendace roe na may pepino, pickle-poached kohlrabi, creamy dill na may horseradish sauce
    • Main course: Itik na pinalamanan ng black chanterelles at lemon thyme, patatas na may caramelized na bawang, at ipinalinamnam ng pickled golden beetroot. Kasama nito ang savoy cabbage (repolyo), pinausukang kabute, inihurnong sibuyas, at spruce oil
    • Panghimagas: Raspberry mousse, dehydrated chocolate mousse, raspberry kissel, at raspberry sorbet

Noong 2018, mayroon pang orkestrang kasama sa pagpasok ng mga dessert.

Ano-ano ang inihahain sa Nobel Banquet?
  • 2021 (Nobel banquet sa Oslo lamang)
    • Cauliflower panna cotta na gawa sa Røros sour cream
    • King Crab Ravioli
    • Aquavit sorbet
    • Reindeer na mula sa Stensaas
    • “Fallen apple” o caramelized na apple compote
    • Iba’t ibang klase ng wine

Rappler.com

(EDITOR’S NOTE: An earlier version of this article didn’t make enough distinction between the Nobel Banquet in Oslo, Norway, and in Stockholm, Sweden. We have added clarifications and updates from the 2021 event in Oslo.)

Source: NobelPrize.org

Basahin ang iba pang Rappler IQ tungkol sa Nobel Prize:

Add a comment

Sort by

There are no comments yet. Add your comment to start the conversation.

Summarize this article with AI

How does this make you feel?

Loading
Download the Rappler App!
Clothing, Apparel, Person

author

Michelle Abad

Michelle Abad is a multimedia reporter at Rappler. She covers the rights of women and children, migrant Filipinos, and labor.