Pamahayag sa Rappler sa kasong tax evasion: Daug ang kamatuoran

Dili matarog ang among dakong pagtuo nga pinaagi sa paghatud og balita, teknolohiya, ug pagpagahum sa katawhan, magpadayon nga molungtad ang demokrasya.

Sa kasamtangan, malipayon kita nga midaug ang kamatuoran batok sa pagpamulitika.

Karong Miyerkules, Enero 18, gi-absuwelto sa First Division sa Court of Tax Appeals (CTA) sa Pilipinas ang Nobel laureate nga si Maria Ressa ug ang Rappler Holdings Corporation (RHC), nga gikasuhan sa kanhing administrasyon ni Rodrigo Duterte nga matud pa kuno misulay pag-ikyas sa pagbayad sa buhis.

Nagpasalamat kami og dako sa korte sa makatarunganong desisyon ug sa pag-ila nga dakong pagpanikas, pagtumo-tumo, ug walay basihan ang mga gipasangil sa Bureau of Internal Revenue (BIR). Kon ugaling gipaboran ang BIR, ang desisyon niini magdala og halapad nga kadaut sa pagpamahayag ug pagpamuhunan.

Namulitika ang BIR ilawom sa administrasyon ni Duterte. Nagpakabuta kini sa mga ebidensiya nga wala motakdo sa salikwaot nga desisyon. Gipamugos niining namaligya og securities ang Rappler Holdings, nga kuno nakaginansiya kini sa pagpangita og puhunan, apan wala kuno nagbayad og buhis.

Enero 2018 dihang gisugdan sa BIR ang dinalian nga imbestigasyon sa RHC ug kang Maria Ressa. Kaniadtong Marso 5, 2018, nag-ingon kini nga ilang pagalilion ang mga dokumento sa kumpanya. Apan tulo ka adlaw na lang ang milabay – sa wala pay nahatag nga papeles ang RHC – gianunsiyo na sa BIR pinaagi sa ilang website nga mipasaka na sila og tax evasion complaint batok sa RHC. Nobyembre 2018, bisan pinasiplat lang ilang pagtanaw sa mga taho sa RHC, mipasaka batok niini ang mga kasong kriminal sa CTA ang BIR ug Department of Justice (DOJ).

Klaro kining pagpamikil ug pag-abuso sa gahum. Pila pa ka kumpanya, patigayon, ug bisan mga pribadong indibiduwal, ang nahimong biktima sa ingon niining kahiwian sa mga ahensiya ug opisyal sa gobyerno? Duna ba silay kadangpanan?

Wala makalusot sa CTA kini nga mga binuang sa BIR ug DOJ. Gikalipay namo sa taman ang nahimong propesyonal, makatarunganon, ug parehas nga desisyon sa hukmanan.

Magapadayon ang Rappler sa pagkaplag ug pagsulay sa mga pwedeng mahimo sa teknolohiya. Mao kini ang nagtukmod kanamo kaniadtong 2015 nga mangita og puhunan, ug himuong halapad ang pagpatigayon pinaagi sa Philippine Depositary Receipts. Dili matarog ang among pagtuo nga pinaagi sa paghatud og balita, teknolohiya, ug gamhanang katawhan, magapadayon nga molungtad ang demokrasya.

Dili lang sila Maria Ressa ug Rappler Holdings ang midaug karong adlawa. Midaug usab ang mga yanong katawhan nga gabayad og buhis, ug ang mga negosyanteng gipamikil sa BIR sa walay igong rason o basihanan.

Kauban kita, magapadayon ang Rappler. Kita ang mag #HoldTheLine. – Rappler.com