Fact checks on public officials

FACT CHECK: Walang kaugnayan sa ‘listahan ng smugglers’ ang resignation ni Clarita Carlos

Rappler.com
FACT CHECK: Walang kaugnayan sa ‘listahan ng smugglers’ ang resignation ni Clarita Carlos
Hindi na nakikita ni UP professor Clarita Carlos na dapat pa siyang magpatuloy bilang national security adviser, kung kaya’t lumipat na lamang siya sa research department ng Kongreso

Ang sabi-sabi: Ibinigay raw ni dating national security adviser (NSA) Clarita Carlos ang listahan ng mga smuggler ng sibuyas, asukal, at iba pa kay Pangulong Ferdinand Marcos Jr. ngunit wala itong ginawa dahil sa ang mga ito’y kaibigan niya umano. Iniuugnay ito sa pagbitiw ni Carlos sa kanyang puwesto. 

Sinabi sa video na pinamagatang “PBBM nagsalita na sa wakas! Calrita Carlos hind na masaya sa gobyerno? Sm*gglers BFF di umano ng Pres!”: “Ito ang nakakagulat. National Security Adviser Clarita Carlos mayroon palang hindi umano ay binigay na mga listahan ng mga pangalan ng smugglers sa sibuyas, asukal, at iba pa, pero wala raw ginawa si PBBM. Napag-alaman umanong itong mga smugglers ay kaibigan ni PBBM.”

Marka: HINDI TOTOO

Bakit kailangang i-fact-check:
Ang video na naglalaman ng sabi-sabi ay mayroong 12,000 views sa kasalukuyan. 

Ang katotohanan: Sa mga panayam at opisyal na pahayag kaugnay ng pagbitiw ni Carlos sa puwesto, walang pagbanggit sa umano’y listahan ng mga smugglers na ibinigay ni Carlos kay Marcos. 

Wala ring balita hinggil dito mula sa mga kilalang news outlet gaya ng GMA, ABS, TV5, CNN, Inquirer, Manila Bulletin, Philstar, at Rappler. 

Ang dahilang tinukoy ni Carlos sa kanyang pagbaba sa puwesto ay hindi na niya nakikitang dapat pa siyang magpatuloy bilang tagapayo ng Pangulo, kung kaya’t lumipat na lamang siya sa ibang ahensiya kung saan magagamit ang kanyang kaalaman sa paggawa ng polisiya.

Sa kanyang mga naging panayam sa Teleradyo noong Enero 16, sinabi niyang masaya siyang lilipat sa Congressional Policy and Budget Research Department (CPBRD) dahil akma ang trabaho rito sa kanyang kakayanan sa paggawa ng polisiya. 

“Happy ako na lilipat ako sa trabaho na talagang akma sa expertise ko,” pahayag ni Carlos matapos sabihing lilipat siya sa CPBRD. Ito’y dahil wala sa kanya, aniya, ang ni isa sa tatlong kuwalipikasyong kailangan upang maging NSA. 

Sa kanyang mga naging panayam sa TeleRadyo, CNN, at sa Tune In kay Tunying kanya ring nabanggit na mayroong “forces” na gusto siyang mapaalis simula pa noong umpisa ng kanyang termino. 

Itinanggi naman ito ni Marcos noong Enero 20 at sinabing naniniwala siyang walang planong paalisin si Carlos mula sa kanyang puwesto. Sinabi ng Pangulo na sa tingin niya’y hindi nagustuhan ni Carlos ang pagiging NSA, na hindi raw nakagugulat dahil think tank ang pinanggalingan niya. – Ailla Dela Cruz/ Rappler.com

Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.

Add a comment

Sort by

There are no comments yet. Add your comment to start the conversation.