Fact checks on public officials

HINDI TOTOO: Walang naitulong si Robredo sa kapitbahay sa Naga City

Rappler.com
HINDI TOTOO: Walang naitulong si Robredo sa kapitbahay sa Naga City
Walang “Brgy. Mariana” sa Naga City at sa buong probinsiya ng Camarines Sur, kung saan hindi umano tumulong sa kapitbahay si Robredo

Buod

  • Ang sabi-sabi: Ibinulgar ng kapitbahay ni Vice President Leni Robredo sa Naga City na masama ang kanyang ugali dahil hindi siya tumulong sa kanila.
  • Marka: HINDI TOTOO
  • Ang katotohanan: Walang “Brgy. Mariana” sa Naga City at sa buong probinsiya ng Camarines Sur, kung saan hindi umano tumulong sa kapitbahay si Robredo. Ang Mariana ay ang barangay na kinatatayuan ng Office of the Vice President, pero nasa Quezon City ito.
  • Bakit kailangang i-fact-check: Sa ngayon, umabot na sa 43,000 reactions, 9.7 comments, at 143,000 shares ang malisyosong post sa Facebook. Isang bidyo naman sa YouTube na may katulad na sabi-sabi ang umani na ng 122, 840 views. 

Mga detalye 

Isang bidyo sa YouTube channel na “Showbiz Fanaticz” na ipinakalat muli nitong Enero 2022 ang pinamagatang “NAKAKAGULAT: KAPITBAHAY ni VP LENI IBINULGAR ang KASAMAAN ng UGALI ni ROBREDO sa mga taga NAGA!?!”

Nakabase ito sa komento sa isang Facebook post na nag-viral noong Hulyo 2019 kung inakusahan ng isang nagpakilalang “kapitbahay” at residente ng “Brgy. Mariana” si Bise Presidente Leni Robredo ng hindi pagtulong sa kanila. Aniya, pumunta raw ang “boss” niya sa opisina ni Robredo at hindi ito pinapasok. Marami raw may ayaw kay Robredo sa nasabing lugar.

Hindi totoo ang sabi-sabing ito. 

Kung titingnan ang opisyal na website ng Naga City, makikita na wala sa listahan ng 27 barangay ang binabanggit na “Brgy. Mariana” sa nasabing Facebook post. Kahit sa buong probinsiya ng Camarines Sur, walang Barangay Mariana sa 1,063 barangay. Walang kinaroroonan ang umano’y kapitbahay na hindi tinulungan.

Samantala, ang Office of the Vice President ay nasa Barangay Mariana sa Quezon City. Kung ito ang pinatutungkulan ng orihinal na komento sa Facebook, walang basehan o patunay ang nasabing paratang.

Matatandaan na bago pa man pumasok sa pulitika, 10 taon muna ang iginugol ni Robredo sa pampublikong serbisyo bilang human rights lawyer sa Sentro ng Alternatibong Lingap Panligan (SALIGAN). Ang naturang opisina, na matatagpuan sa J. Miranda Avenue, Naga City, ay bukas na tumutulong sa mahihirap at walang kakayahang magbayad sa serbisyo ng mga abogado.

Ayon naman sa report ng Commission of Audit para sa taong 2021, nahigitan ng OVP ang mga target nito sa pagtugon sa mga request at pagpapatupad ng mga proyekto ng partners.

Nitong kasagsagan ng pandemya, matatandaang gumastos ng P505.3 milyon ang opisina ng Bise Presidente para sa tulong-medikal, pondong pambili ng PPEs, at testing kits. – Rochel Ellen Bernido/Rappler.com

Kung may nakikita Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon. kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.