FACT CHECK: Walang Marcos account na ibinalik nang bumisita ang European Commission president

Ang sabi-sabi: Nakuha na ni Pangulong Ferdinand Marcos Jr. ang $987 bilyon mula sa isang umano’y Belgium bank account na nakapangalan sa kanyang ama noong bumisita ang pinuno ng European Commission sa Pilipinas. 

Marka: HINDI TOTOO

Bakit kailangang i-fact-check: Sa kasalukuyan, ang YouTube video na naglalaman ng sabi-sabi ay mayroong 23,000 views sa account na mayroong 425,000 subscribers.

Ipinahihiwatig sa thumbnail ng video na nakuha na ang umano’y Marcos account sa naging pagbisita ni European Commission President Ursula von der Leyen sa Pilipinas nitong Hulyo 2023.  

Laman ng thumbnail ang litrato nina Marcos at Von der Leyen kalakip ang tekstong: “$987 billion dollars. Marcos account sa wakas nakuha na ni PBBM.” 

Makikita rin sa thumbnail ang imahe ng ina ng Pangulo na si Imelda Marcos, hawak ang isang di malinaw na dokumento at katabi ang tekstong “987 billion pinakita (sic) na.”

Ang katotohanan: Hindi totoong nakuha na ng Presidente, at hindi rin ipinakita, ang umano’y $987 bilyong halaga ng Marcos account sa naging pagbisita ni Von der Leyen sa Pilipinas nitong Hulyo. Wala ring pruwebang mayroon ngang account ang pamilya Marcos sa isang bangko sa Belgium. 

Pondo para sa green energy: Ang perang itinatampok sa okasyon na pinagmulan ng litrato ay ang 60 milyong euros na grant na ipinagkaloob ng European Union sa Pilipinas para sa Green Economy Program. Ang ang Green Economy Program ay inisyatiba sa ilalim ng programang Global Gateway. Naglalayon itong tulungan ang Pilipinas na makamit ang circular economy at renewable energy, at mapagaan ang masamang epekto ng climate change. 

Ang litratong ipinakita sa thumbnail ng video ay mula sa pirmahan nina Marcos at Von der Leyen ng kasunduan sa Malacañang noong Hulyo 31. 

Hindi mapatunayan: Walang pruwebang ipinakita ang video na may bank account ang pamilya Marcos sa Belgium. 

Ipinakita rin sa video ang clip mula sa isang dokumentaryo ng BBC noong 2009 na nagtampok kay Imelda Marcos at BBC journalist na si Simon Reeve. Sa video clip, ipinakita ng dating unang ginang ang isang sertipikong nagpapatunay raw ng $987 bilyong nakadeposito sa isang bangko sa Brussels, Belgium, sa ilalim ng pangalan ni dating pangulong Ferdinand E. Marcos. 

Hindi na available sa website ng BBC ang nasabing dokumentaryo. At ayon sa naunang fact check ng Vera Files noong 2022, walang makapagpapatunay sa umano’y bank account. 

Narito ang ilan pang fact check kaugnay sa hindi mapatunayang Marcos account: 

• Marcos Jr. didn’t meet Belgian King to withdraw $987 billion
• FACT CHECK: P9.8 bilyon lamang ang inulat na naiuwi ni Marcos mula sa Belgium
• FACT CHECK | Claim that Marcos could withdraw $987B from overseas accounts has no basis

– Ailla dela Cruz/Rappler.com
Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.